Bud MRT nədir?
Bud MRT tomoqrafın yaratdığı maqnit sahəsində toxumalardakı hidrogen atomlarının verdiyi siqnalların qeydə alınmasına və kompüter tərəfindən təbəqəli təsvirlərə çevrilməsinə əsaslanır. Bu üsul yumşaq toxumaları — dördbaşlı və arxa qrup (hamstring) əzələləri, addusktorları, vətərləri, fassiyaları, sinir və damarları, dərialtı yağ qatını rentgen və KT ilə müqayisədə xeyli aydın göstərir. Eyni zamanda bud sümüyünün iliyindəki dəyişikliklər — ödem, iltihab, nekroz ocaqları və şiş infiltrasiyası erkən mərhələdə aşkarlana bilir. Zərurət yaranarsa, törəmənin qanla təchizatını və iltihabi prosesin sərhədlərini dəqiqləşdirmək üçün müayinə vena daxilinə yeridilən qadolinium əsaslı kontrast maddə ilə tamamlanır.
Müayinə necə aparılır?
Pasiyent bütün metal əşyaları (kəmər, zinət əşyaları, saat, bank kartları, metal detalı olan geyim) çıxarır və hərəkət edən masanın üzərində arxası üstə uzanır. Bud nahiyəsinə xüsusi qəbuledici sarğac (coil) yerləşdirilir, masa tomoqrafın tuneli boyunca hərəkət etdirilir. Müayinə zamanı aparat kifayət qədər səsli işləyir — bunun üçün qulaqlıq və ya səs izolyasiya edən tıxaclar verilir. Ən vacib şərt tam hərəkətsiz qalmaqdır, çünki cüzi tərpəniş belə təsvirin keyfiyyətini pozur. Prosedur ağrısızdır və adətən 20–40 dəqiqə davam edir; kontrast tətbiq olunarsa, müayinənin ortasında qol venasına preparat yeridilir və skanlama davam etdirilir.
