Boyun MRT nədir?
Maqnit rezonans tomoqrafiya (MRT) güclü maqnit sahəsi və radiotezlikli dalğalar vasitəsilə orqanların yüksək dəqiqlikli kəsik təsvirlərini yaradan müayinə üsuludur. Boyun MRT-də qalxanabənzər və qalxanabənzərətrafı vəzilər, tüpürcək vəziləri, limfa düyünləri, qırtlaq, udlaq, əzələlər, damarlar və ətraf piy toxuması qiymətləndirilir. Rentgen və kompüter tomoqrafiyasından fərqli olaraq burada ionlaşdırıcı şüalanma istifadə olunmur. Zərurət yaranarsa, damardan kontrast maddə yeridilməklə şişlərin, iltihabi ocaqların və damar strukturlarının görüntüsü daha aydınlaşdırılır. Qeyd edək ki, boyun onurğası və fəqərəarası disklərin müayinəsi ayrıca protokol — boyun onurğasının MRT-si ilə aparılır.
Müayinə necə aparılır?
Pasiyent üzərindəki bütün metal əşyaları (zəncir, sırğa, saat, bank kartları) çıxarır və tomoqrafın hərəkət edən masası üzərinə arxası üstə uzanır. Boyun nahiyəsinə siqnalı gücləndirən xüsusi sarğac (koil) qoyulur, masa aparatın tuneli daxilinə sürüşdürülür. Müayinə 20–40 dəqiqə çəkir; kontrastla aparıldıqda müddət bir qədər uzanır. Prosedur tamamilə ağrısızdır, yalnız aparatın işi zamanı yüksək səs eşidilir — bunun üçün qulaqlıq və ya qulaq tıxacı verilir. Ən vacib şərt hərəkətsiz uzanmaqdır, çünki hər hansı tərpəniş görüntünün keyfiyyətini pozur.
