Diz MRT nədir?
MRT (maqnit-rezonans tomoqrafiya) güclü maqnit sahəsi və radiotezlikli impulslardan istifadə edərək toxumalardakı hidrogen atomlarının siqnallarını qeydə alır və kompüter bu siqnalları dəqiq təbəqəli təsvirlərə çevirir. Diz MRT-də hər iki menisk, ön və arxa çarpaz bağlar, yan bağlar, diz qapağı vətəri, oynaq qığırdağı, sümük iliyi və oynaqətrafi yumşaq toxumalar ayrı-ayrılıqda qiymətləndirilir. Rentgen və KT-dən fərqli olaraq MRT yumşaq toxumaları çox yüksək kontrastla göstərir, ona görə də menisk cırılması və bağ zədələri məhz bu üsulla dəqiq təyin olunur. Müayinə zamanı ionlaşdırıcı şüalanma istifadə edilmir, yəni şüa yükü yoxdur.
Müayinə necə aparılır?
Pasiyent metal əşyaları (açar, telefon, bank kartı, saat, zinət əşyaları) çıxarır və tomoqrafın masası üzərində arxası üstə uzanır. Diz üzərinə xüsusi qəbuledici sarğac (kotuşka) yerləşdirilir və ayaq rahat vəziyyətdə sabitlənir — təsvirlərin aydın olması üçün müayinə boyu tərpənməmək vacibdir. Prosedur adətən 20-40 dəqiqə çəkir, kontrast maddə tələb olunarsa müddət bir qədər uzana bilər. Müayinə tamamilə ağrısızdır; yalnız aparatın yaratdığı güclü səs eşidilir, bunun üçün qulaqlıq və ya qulaq tıxacı verilir.
