Bud-çanaq skrininqi nədir?
Bud-çanaq skrininqi körpənin bud sümüyünün başı ilə çanaq sümüyündəki oyuq (asetabulum) arasındakı uyğunluğun ultrasəs dalğaları ilə qiymətləndirilməsidir. Həkim oyuğun dərinliyini, sümük və qığırdaq örtüyünü, bud sümüyü başının mərkəzləşməsini ölçür və çox vaxt beynəlxalq Graf təsnifatına uyğun bucaqları (alfa və beta) hesablayır. Bu ölçülər əsasında oynağın yetkin, gecikmiş inkişaflı (displaziya) və ya çıxıq vəziyyətdə olduğu müəyyən edilir. Körpələrdə oynaq əsasən qığırdaqdan ibarət olduğu üçün ultrasəs bu yaşda rentgenə nisbətən daha informativdir və şüalanma daşımır.
Müayinə necə aparılır?
Körpə müayinə masasında yan və ya arxası üstə uzadılır, ayaqlar sərbəst və rahat vəziyyətdə saxlanılır. Həkim oynaq nahiyəsinə xüsusi gel sürtür və ultrasəs datçikini dərinin üzərində sürüşdürərək hər iki oynağın standart kəsiklərini alır. Müayinə tamamilə ağrısızdır, iynə və ya dərman tələb olunmur; adətən 10-15 dəqiqə çəkir. Körpənin sakit olması təsvir keyfiyyətini yaxşılaşdırdığı üçün müayinəni yemək sonrası və ya yuxu vaxtına planlaşdırmaq məsləhətdir.
