Göz yuvası (orbita) rentgeni nədir?
Orbita — göz almasını, əzələləri, sinirləri və piy toxumasını qoruyan sümük çuxurudur. Rentgen müayinəsi zamanı bədəndən keçən şüalar sümük və yumşaq toxumalarda müxtəlif dərəcədə udulur, nəticədə orbitanın divarları, yuxarı və aşağı kənarları, göz yuvasının dibi və qonşu burunətrafı ciblər təsvirdə əks olunur. Bu üsul sümük bütövlüyünün pozulmasını, orbita həcminin dəyişməsini və rentgen şüalarını keçirməyən (metal, şüşənin bəzi növləri) yad cisimləri göstərir. Yumşaq toxumalar — göz alması, görmə siniri, əzələlər — rentgendə zəif seçildiyi üçün onların dəqiq qiymətləndirilməsi ultrasəs, KT və ya MRT ilə aparılır. Buna baxmayaraq, orbita rentgeni MRT-dən əvvəl metal qırıntının olub-olmadığını yoxlamaq üçün mühüm və sürətli bir addımdır.
Müayinə necə aparılır?
Müayinədən əvvəl baş nahiyəsindəki metal əşyalar — eynək, sırğa, saç sancağı, çıxarıla bilən protezlər — kənarlaşdırılır. Pasiyent rentgen aparatının qarşısında oturdulur və ya masada uzandırılır, baş radioloq texnikinin göstərişi ilə lazımi vəziyyətə gətirilir. Adətən iki proyeksiyada (düz və yan, bəzən xüsusi kəllə proyeksiyaları) şəkil çəkilir; çəkiliş anında bir neçə saniyə tərpənməmək və gözləri sabit saxlamaq tələb olunur. Bədənin qalan hissəsi qorşunlu önlüklə örtülür. Bütün proses adətən 5–10 dəqiqə çəkir və tamamilə ağrısızdır.
