Süd vəzinin rəngli doppler müayinəsi nədir?
Müayinə zamanı həkim süd vəzisinin dərisinə xüsusi gel çəkir və yüksək tezlikli xətti ultrasəs zondu ilə vəzinin bütün kvadrantlarını, süd yollarını, gilə arxası nahiyəni, qoltuqaltı, körpücükaltı və körpücüküstü limfa düyünlərini müayinə edir. Sonra rəngli doppler və spektral doppler rejimləri qoşulur: monitorda qan axını rənglə (adətən qırmızı və mavi tonlarla) əks olunur, damarların sayı, yerləşməsi və qan axınının sürət göstəriciləri qeydə alınır. Bu, kistin sadə maye tutumu olduğunu, düyünün isə zəif və ya intensiv qanlanmaya malik olduğunu ayırd etməyə kömək edir. Doppler həmçinin implant və ya əməliyyat sonrası dəyişikliklərin, iltihabi proseslərin qiymətləndirilməsində faydalıdır.
Müayinə necə aparılır?
Pasiyent belindən yuxarı soyunur və müayinə masasında arxası üstə uzanır, əli baş tərəfə qaldırılır — bu, vəzi toxumasının bərabər yayılmasını təmin edir. Yan hissələri və qoltuqaltı nahiyəni yaxşı görmək üçün həkim yan vəziyyətə keçməyi xahiş edə bilər. Dəriyə şəffaf, bədən üçün zərərsiz gel çəkilir, zond yumşaq təzyiqlə vəzi üzərində hərəkət etdirilir. Prosedur ağrısızdır, yalnız iltihab və ya güclü həssaslıq olduqda cüzi diskomfort hiss oluna bilər. Doppler rejimində cihazdan gələn ritmik səslər normal haldır. Müayinə 15–20 dəqiqə davam edir, sonrasında heç bir məhdudiyyət yoxdur — pasiyent dərhal adi həyat ritminə qayıda bilər.
