Uşaq USM nədir?
Ultrasəs müayinəsi insan qulağının eşitmədiyi yüksək tezlikli səs dalğalarının toxumalardan əks olunması prinsipinə əsaslanır. Datçikdən (sensor) yayılan dalğalar orqanlardan qayıdır və aparat bu siqnalları ekranda təsvirə çevirir. Uşaqlarda qarın boşluğu orqanları (qaraciyər, öd kisəsi, mədəaltı vəzi, dalaq), böyrəklər və sidik kisəsi, çanaq orqanları, qalxanabənzər vəz, limfa düyünləri, çanaq-bud oynaqları, ürək (exokardioqrafiya) və körpələrdə açıq böyük əmgək vasitəsilə beyin (neyrosonoqrafiya) müayinə oluna bilər. Uşaq toxumaları nazik olduğundan ultrasəs təsviri çox vaxt böyüklərdəkindən daha aydın alınır. Metod ionlaşdırıcı şüalanma yaratmadığı üçün yenidoğulmuşlarda belə təhlükəsizdir.
Müayinə necə aparılır?
Uşaq kuşetkada arxası və ya yanı üstə uzandırılır, valideyn bütün müddət ərzində yanında ola bilər. Həkim müayinə olunan nahiyəyə xüsusi gel sürtür — gel datçiklə dəri arasında hava boşluğunu aradan qaldırır və isidilmiş şəkildə istifadə oluna bilər. Sonra datçik dəri üzərində sürüşdürülür, həkim ekranda orqanların ölçüsünü, quruluşunu və qan dövranını qiymətləndirir. Prosedur ağrısız keçir, adətən 10–20 dəqiqə çəkir, iynə və dərman tələb olunmur. Sonda gel salfetlə silinir və uşaq dərhal adi rejiminə qayıda bilər.
