Onurğa KT nədir?
Onurğa KT (kompüter tomoqrafiyası) rentgen şüalarının bədəni müxtəlif bucaqlardan keçməsi və kompüter tərəfindən emal olunması əsasında işləyir. Nəticədə həkim onurğanı milimetrlik nazik kəsiklərlə, həmçinin üçölçülü (3D) rekonstruksiyada görə bilir. Müayinə fəqərə cisimlərini, qövsləri, üzlü oynaqları, onurğa kanalının enini və disklərin vəziyyətini qiymətləndirməyə imkan verir. KT sümük toxumasını adi rentgendən qat-qat dəqiq göstərdiyi üçün kiçik sınıqlar, çatlar və sümük artımları (osteofitlər) rahat aşkarlanır. Müayinə boyun, döş, bel-oma nahiyəsi və ya bütün onurğa üzrə ayrı-ayrılıqda aparıla bilər.
Müayinə necə aparılır?
Pasiyent metal əşyaları (kəmər, zəncir, saat, bəzi geyim aksesuarları) çıxarır və tomoqrafın hərəkət edən masasında arxası üstə uzanır. Masa halqavari aparatın içindən yavaş-yavaş keçir, bu zaman skanlama aparılır; heç bir ağrı və ya narahatlıq hiss olunmur. Görüntülərin aydın olması üçün bir neçə saniyə hərəkətsiz qalmaq, bəzən nəfəsi qısa müddət saxlamaq lazım gəlir. Skanlamanın özü adətən bir neçə dəqiqə, hazırlıqla birlikdə bütün proses təxminən 10-15 dəqiqə çəkir. Bəzi hallarda (şiş, iltihab, damar strukturlarının qiymətləndirilməsi) venadan kontrast maddə yeridilə bilər — bu barədə həkim əvvəlcədən məlumat verir.
