Böyrəküstü vəzlər MRT nədir?
Böyrəküstü vəzlər böyrəklərin yuxarı qütbündə yerləşən, kortizol, aldosteron və adrenalin kimi hormonlar ifraz edən kiçik endokrin orqanlardır. MRT zamanı pasiyent güclü maqnit sahəsinin təsiri altında yerləşdirilir, orqanizmin hidrogen atomlarından alınan siqnallar kompüter tərəfindən müxtəlif müstəvilərdə (aksial, koronar, saqittal) təsvirlərə çevrilir. Rentgen şüası istifadə olunmadığı üçün metod şüa yükü yaratmır. T1, T2 və xüsusilə kimyəvi sürüşmə ardıcıllıqları törəmənin daxilində mikroskopik yağ tərkibini aşkarlayaraq xoşxassəli adenomanı feoxromositoma, metastaz və ya adrenokortikal karsinomadan fərqləndirməyə imkan verir. Zərurət yaranarsa, damardaxili qadolinium əsaslı kontrast maddə ilə əlavə seriya alınır.
Müayinə necə aparılır?
Pasiyent bütün metal əşyaları — saat, zinət əşyaları, kəmər, bank kartları və metal detalı olan geyimləri çıxarır, sonra tomoqrafın hərəkət edən masasında arxası üstə uzanır. Qarın nahiyəsinin üzərinə xüsusi qəbuledici sarğac (kolil) qoyulur və masa aparatın tunelinə daxil olur. Skan zamanı yüksək səs eşidilir, buna görə qulaqlıq və ya səs izolyasiyalı tıxac verilir. Təsvirlərin aydın alınması üçün hərəkətsiz qalmaq və operatorun göstərişi ilə qısa müddət (10–20 saniyə) nəfəsi saxlamaq tələb olunur. Müayinə kontrastsız 20–25 dəqiqə, kontrastla 30–40 dəqiqə çəkir. Kontrast istifadə olunarsa, qol venasına kateter qoyulur; prosedur ağrısızdır.
