Alt çənə 3D tomoqrafiyası nədir?
KLKT — dişlərin və çənə sümüyünün konus formalı rentgen dəstəsi ilə skan edilməsi üsuludur. Aparat başın ətrafında bir dövrə vuraraq yüzlərlə təsvir toplayır, kompüter isə onları birləşdirib alt çənənin üçölçülü modelini qurur. Nəticədə sümüyün hündürlüyü və eni, sümük sıxlığı, diş köklərinin sayı və əyriliyi, kök kanallarının anatomiyası, alt çənə kanalı (nervus alveolaris inferior) və mental dəliyin dəqiq yeri görünür. Həmçinin kist, qranulema, retensiyalı (sümük içində qalmış) ağıl dişləri, sınıq və iltihabi dəyişikliklər aşkarlanır. Şüa yükü tibbi kompüter tomoqrafiyaya nisbətən əhəmiyyətli dərəcədə aşağıdır, çünki skan zonası yalnız çənə nahiyəsi ilə məhdudlaşır.
Müayinə necə aparılır?
Müayinədən əvvəl sırğa, boyunbağı, saç sancağı, eynək və çıxarıla bilən protezlər çıxarılır, lazım olduqda qorşuyucu qurşun önlük geyindirilir. Pasiyent aparatın qarşısında dayanır və ya oturur, çənəsini xüsusi dayaqa qoyur, alın və gicgah fiksatorları ilə baş sabit saxlanılır. Skan zamanı halqa başın ətrafında bir dəfə fırlanır — bu adətən 10-40 saniyə çəkir; bu müddətdə tərpənməmək və nəfəsi sakit saxlamaq vacibdir. Prosedur tamamilə ağrısızdır, iynə və kontrast maddə tələb olunmur, ümumilikdə 5-10 dəqiqə vaxt aparır.
