Koronar KT-angioqrafiya nədir?
Koronar KT-angioqrafiya çoxkəsikli kompüter tomoqrafla aparılan, ürək və onun damarlarının üçölçülü təsvirini verən müayinədir. Aparat rentgen şüalarından istifadə edərək ürəyin döyüntüləri ilə sinxron (EKQ ilə əlaqələndirilmiş) çoxsaylı nazik kəsiklər alır, kompüter isə bu kəsiklərdən koronar arteriyaların dəqiq modelini qurur. Vena daxilinə yeridilən yod tərkibli kontrast maddə damar mənfəzini «işıqlandırır» və daralmaların dərəcəsini qiymətləndirməyə imkan verir. Müayinə həm damar divarındakı yumşaq və əhəngli aterosklerotik lövhələri, həm də stent və aortakoronar şuntların vəziyyətini göstərir. Bəzi hallarda əvvəlcə kontrastsız çəkiliş edilərək kalsium indeksi (kalsium skoru) hesablanır.
Müayinə necə aparılır?
Pasiyentin qoluna venadaxili kateter qoyulur, döş qəfəsinə EKQ elektrodları bərkidilir və o, kürəyi üstə tomoqraf masasında yerləşdirilir. Ürək vurğusu yüksək olduqda həkim təyinatı ilə əvvəlcədən ürək ritmini yavaşladan dərman (beta-blokator), lazım gəldikdə damarları genişləndirən dilaltı preparat verilə bilər. Sonra avtomatik şprislə kontrast maddə yeridilir — bu zaman bədəndə istilik hissi və ağızda metal dadı ola bilər, bu normaldır. Çəkiliş zamanı sizdən 5-15 saniyə nəfəsi saxlamaq xahiş olunacaq; skan özü bir neçə saniyə, bütün prosedur isə hazırlıqla birlikdə təxminən 15-30 dəqiqə çəkir. Müayinə ağrısız keçir, yeganə narahatlıq kateterin qoyulması zamanı iynə batmasıdır.
