Cərrahi şablon nədir və dizayn nə üçün lazımdır?
Cərrahi şablon dişlərin və ya dişətinin üzərinə dəqiq oturan fərdi qəlibdir. Onun içində metal halqalı yönləndirici yuvalar olur: cərrah implant üçün yuvanı açarkən alət bu halqalardan keçir və planlaşdırılan istiqamətdən kənara çıxa bilmir. Şablon nə qədər dəqiq olursa, implant da o qədər dəqiq yerləşir — ona görə əsas iş dizayn mərhələsində görülür. Dizaynda həkim sümüyün həcmini və sıxlığını, sinir kanalını, haymor cibini, qonşu dişlərin köklərini görür və implantı həm təhlükəsiz, həm də gələcək diş (taxma) üçün ən əlverişli nöqtəyə yerləşdirir.
Dizayn üçün hansı məlumatlar lazımdır?
Birincisi, implant nahiyəsini əhatə edən 3D tomoqrafiya (CBCT) faylıdır (DICOM formatında). Skan zamanı dişlərin bir-birinə toxunmaması üçün adətən pambıq tampon dişlədilir və metal əşyalar çıxarılır — bu, şəklin keyfiyyətini artırır. İkincisi, dişlərin və dişətinin rəqəmsal modelidir: ağız içi skanerlə alınan və ya gips modelin skanından hazırlanan STL faylı. Bu iki məlumat proqramda üst-üstə salınır. Dişsiz çənədə əlavə olaraq pasiyentin protezi ayrıca skan edilir. Həkimin göndərişində implant sistemi və planlaşdırılan diş sayı göstərilir.
