Qırtlaq KT nədir?
Qırtlaq KT boyun nahiyəsi ətrafında sürətlə fırlanan rentgen borusu və çoxsaylı detektor sıraları vasitəsilə millimetrdən nazik kəsiklərin alınmasına əsaslanır. Multidetektor və spiral tomoqraflar bütün nahiyəni fasiləsiz spiral hərəkətlə skan etdiyi üçün nəfəs alma və udqunma zamanı yaranan artefaktlar minimuma enir. Kompüter alınan məlumatları emal edərək qırtlağın koronal, saggital və üçölçülü təsvirlərini, zərurət olduqda isə virtual laringoskopiya təsvirlərini qurur. Həkim bu təsvirlər üzərində səs tellərini, qırtlaqaltı və qırtlaqüstü sahələri, tiroid və perstən qığırdaqlarını, boyun limfa düyünlərini və qonşu toxumaları qiymətləndirir. Şiş prosesinin yayılmasını dəqiqləşdirmək üçün müayinə vena daxilinə yeridilən kontrast maddə ilə də aparıla bilər.
Müayinə necə aparılır?
Pasiyent boyun nahiyəsindəki metal əşyaları — zəncir, sırğa, çıxarılan diş protezi və eynəyi çıxarır, sonra hərəkət edən masanın üzərində arxası üstə uzanır. Baş bir qədər arxaya əyilmiş vəziyyətdə sabitlənir, masa tomoqrafın halqavari hissəsindən keçir. Skan zamanı hərəkətsiz qalmaq, udqunmamaq və danışmamaq, radioloq laborantın göstərişi ilə nəfəsi qısa müddət saxlamaq vacibdir. Bəzi hallarda səs tellərinin funksiyasını qiymətləndirmək üçün əlavə olaraq fonasiya (uzadılmış «i» səsinin tələffüzü) və ya Valsalva sınağı zamanı təkrar skan aparılır. Skanın özü bir neçə saniyə, hazırlıqla birlikdə isə bütün prosedur orta hesabla 10–15 dəqiqə çəkir və ağrısızdır.
