Döş qəfəsi rentgenoskopiyası nədir?
Rentgenoskopiya (floroskopiya) rentgen şüalarının bədəndən keçərək xüsusi detektor üzərində davamlı təsvir yaratması prinsipinə əsaslanır. Həkim monitorda ağciyər sahələrini, ürək kölgəsini, iri damarların konturlarını və diafraqmanın hər iki günbəzinin hərəkətini canlı şəkildə izləyir. Bu üsul mayenin plevra boşluğunda yerdəyişməsini, diafraqmanın iflicini (paradoksal hərəkət), ağciyər kökündəki pulsasiyanı və yad cisimlərin lokalizasiyasını aşkar etməyə imkan verir. Zərurət olduqda pasiyenti müxtəlif vəziyyətlərdə (fırlanaraq, əyilərək) yoxlamaqla kölgənin hansı struktura aid olduğu dəqiqləşdirilir. Rentgenoskopiya çox vaxt adi döş qəfəsi rentgenoqrafiyasını tamamlayan dəqiqləşdirici müayinə kimi istifadə olunur.
Müayinə necə aparılır?
Pasiyent belədən yuxarı soyunur, metal əşyaları, zinət və boyunbağıları çıxarır. Sonra rentgen aparatının ekranı ilə şüa borusu arasında ayaq üstə dayanır; həkim göstərişlərə uyğun olaraq dərin nəfəs almağı, nəfəsi saxlamağı və ya öskürməyi xahiş edir. Həkim təsviri monitorda izləyərək pasiyenti müxtəlif bucaqlar altında çevirir və şübhəli sahələri dəqiqləşdirir. Prosedur ağrısızdır və adətən bir neçə dəqiqə davam edir; şüalanma müddətini minimuma endirmək üçün həkim aparatı yalnız lazım olan anlarda işə salır.
