Diaqnostik mammoqrafiya nədir?
Diaqnostik mammoqrafiya süd vəzi toxumasının aşağı dozalı rentgen şüaları ilə təsvirini almağa əsaslanan görüntüləmə üsuludur. Müasir rəqəmsal mammoqraflar toxumanın strukturunu yüksək dəqiqliklə göstərir və şəkli monitorda böyüdərək təhlil etməyə imkan verir. Müayinə kistaları, fibroadenomaları, süd vəzinin sıxlıq dəyişikliklərini, ödemi, dəri qalınlaşmasını və xüsusilə mikrokalsinatları (çox kiçik əhəng çöküntüləri) aşkar edir — sonuncular bəzən xərçəngin ən erkən əlaməti olur. Şikayət olan zonaya yönəlmiş nöqtəvi kompressiya və böyütmə çəkilişləri əlavə məlumat verir. Nəticə beynəlxalq BI-RADS sistemi üzrə kateqoriyalaşdırılır və növbəti addımlar (müşahidə, USM, biopsiya) müəyyənləşdirilir.
Müayinə necə aparılır?
Pasiyent belden yuxarı soyunur, boyunbağı və digər metal əşyaları çıxarır və mammoqraf aparatının qarşısında dayanır. Radioloq texniki hər bir süd vəzisini xüsusi lövhələr arasında qısa müddətə sıxır — kompressiya təsvirin keyfiyyətini artırır və şüa dozasını azaldır. Standart olaraq hər döşdən iki proyeksiya (yuxarıdan-aşağı və çəp) alınır, zərurət olduqda əlavə hədəflənmiş və ya böyüdülmüş çəkilişlər edilir. Bütün prosedur adətən 10-20 dəqiqə çəkir; sıxılma anında qısamüddətli diskomfort və ya təzyiq hissi ola bilər, lakin bu, bir neçə saniyə davam edir və ağrıkəsici tələb etmir.
