Ağciyər (döş qəfəsi) rentgeni ən çox təyin olunan görüntüləmə müayinələrindən biridir: sürətli, ucuz və məlumatlıdır. Uzanan öskürək, hərarət, nəfəs darlığı və ya sinə ağrısında adətən ilk addım məhz ağciyər rentgenidir.
Ağciyər rentgeni hansı problemləri göstərir?
- Pnevmoniya (sətəlcəm) — ağciyər toxumasında infiltrasiya sahələri;
- Vərəm və onun izləri;
- Plevrit — ağciyər ətrafında maye yığılması;
- Pnevmotoraks — ağciyərin sönməsi (təcili hal);
- Bəzi törəmələr və düyünlər;
- Ürək kölgəsinin ölçüsü — ürək böyüməsinin dolayı əlaməti;
- Qabırğa sınıqları və döş qəfəsi travmaları.
Necə çəkilir və nə qədər çəkir?
Ayaq üstə, aparatın lövhəsinə sinə ilə söykənirsiniz, dərin nəfəs alıb bir neçə saniyə saxlayırsınız — çəkiliş bitdi. Bütün proses 2-3 dəqiqədir, xüsusi hazırlıq tələb olunmur; yalnız boyun-sinə nahiyəsindəki metal əşyalar (boyunbağı, sancaq) çıxarılır.
Rentgen nəyi GÖSTƏRMİR?
Rentgen icmal müayinədir — kiçik düyünləri, erkən mərhələli dəyişiklikləri və damar problemlərini görməyə bilər. Şübhəli hallarda həkim ağciyər KT-si təyin edir.
Nə vaxt KT lazımdır?
- Rentgendə şübhəli kölgə tapılanda — dəqiqləşdirmə üçün;
- Uzun müddət siqaret çəkənlərdə erkən yoxlama (aşağıdozalı KT) məqsədilə;
- Ağırlaşmış pnevmoniya, bronxoektaziya, interstisial xəstəlik şübhəsində;
- Travmadan sonra daxili zədələnmənin qiymətləndirilməsində.
KT ağciyəri millimetrlik kəsiklərlə göstərir — rentgenin görmədiyi xırda dəyişiklikləri aşkarlayır. Fərqləri barədə ətraflı: KT ilə MRT-nin fərqi.
Şüalanma barədə
Müasir rəqəmsal aparatlarda ağciyər rentgeninin dozası çox aşağıdır — bir neçə günlük təbii fon şüalanmasına bərabərdir. Hamiləlikdə isə mütləq əvvəlcədən bildirin: hamiləlikdə rentgen olarmı?
Tez-tez verilən suallar
Nəticə nə vaxt hazır olur? Şəkil dərhal alınır; həkim rəyi adətən həmin gün, bəzən bir neçə saata verilir.
İldə neçə dəfə çəkdirmək olar? Universal limit yoxdur — hər müayinə göstərişlə aparıldıqda təhlükəsiz sayılır; qərarı həkim verir.
Harada çəkdirmək olar? Ağciyər rentgeni xidməti göstərən mərkəzlər — şəhərə görə süzün, qiymətləri müqayisə edin.